- Promoverán accións de apoio a pacientes con patoloxías neurodegenerativas e á súa contorna familiar, e iniciativas para a prevención da deterioración cognitiva e funcional
- O convenio garante tamén aos socios da Asociación de Familiares de Enfermos de Alzheimer e outras demencias de Galicia (AFAGA) mellores condicións no acceso aos servizos do hospital
Vigo, 25 de marzo de 2026.- Vithas Vigo e a Asociación de Familiares de Enfermos de Alzheimer e outras demencias de Galicia (AFAGA Alzheimer) asinaron un convenio marco de colaboración para realizar actividades conxuntas de apoio, tanto a pacientes con enfermidades neurodegenerativas como á súa contorna familiar e convivencial, e tamén a persoas maiores de 55 anos sen diagnóstico que busquen previr a deterioración con hábitos saudables, cognitivos e funcionais.
O acordo, asinado polo xerente de Vithas Vigo, Ciro Cabezas, e o presidente de AFAGA, Juan Carlos Rodríguez, senta as bases da colaboración futura en proxectos de investigación e innovación, enfocados en ampliar o coñecemento científico da prevención, no diagnóstico das demencias e no seguimento clínico de pacientes con patoloxías neurodegenerativas.
Ambas as entidades apoiarán iniciativas que aborden o reto da lonxevidade, a soidade non desexada e a loita contra o idadismo e a estigmatización das demencias. Colaborarán, ademais, no soporte ás persoas coidadoras e a familiares de persoas con demencia, e en fomentar a corresponsabilidade nos coidados, así como na promoción de actividades interxeracionais e de campañas de sensibilización e de formación en prevención e mellora do diagnóstico. O convenio garante tamén aos socios de AFAGA mellores condicións no acceso aos servizos de Vithas Vigo.
“Esta alianza reforza o firme compromiso de Vithas Vigo coa investigación en novas fórmulas para abordar a lonxevidade e o envellecemento saudable, cun enfoque innovador que se apoie no que chamamos o medicamento das 7 P: preventiva, preditiva, personalizada, proactiva, precisa, participativa e pracenteira”, destacou Ciro Cabezas.
“Para AFAGA é importante traballar co ecosistema da saúde e dos coidados para mellorar a abordaxe e diagnóstico das demencias. Este convenio permítenos desenvolver estratexias conxuntas con Vithas Vigo para avanzar en prevención, diagnóstico temperán e intervención en etapas iniciais da enfermidade”, sinalou Juan Carlos Rodríguez.
Sobre AFAGA
A Asociación de Familiares de Enfermos de Alzheimer e outras demencias de Galicia (AFAGA Alzheimer) é unha entidade sen ánimo de lucro que realiza diferentes actividades para mellorar a calidade de vida das persoas con Alzheimer e outras demencias e a dos seus familiares. En 2025, atendeu a 3.628 persoas, das que 613 eran persoas usuarias con demencia e 1.075 participantes en programas de prevención á deterioración, en 16 concellos da provincia de Pontevedra.
Sobre Vithas
O grupo Vithas está integrado por 22 hospitais e 40 centros médicos e asistenciais distribuídos por 14 provincias. Os 14.500 profesionais que conforman Vithas convertérono nun dos líderes da sanidade española.
Ademais, o grupo integra á Fundación Vithas, Vithas Rede Diagnóstica e a central de compras PlazaSalud. Vithas, apoiada polo grupo Goodgrower, fundamenta a súa estratexia corporativa na calidade asistencial acreditada, a experiencia paciente, a investigación e a innovación e o compromiso social e medioambiental.
