— Iniciativas innovadoras e dixitalización para frear o despoboamento e impulsar o talento mozo en oito países europeos
Bruxelas, 5 de xuño de 2026. O proxecto RuralYouthFuture publica na súa plataforma web un resumo das súas “Mellores prácticas”, destacando iniciativas inspiradoras que apoian o emprego xuvenil e o desenvolvemento sustentable en zonas rurais de toda Europa.
As prácticas seleccionadas amosan enfoques innovadores que axudan á mocidade a acceder a novas oportunidades laborais, fortalecer as súas habilidades dixitais e manterse activa nas súas comunidades locais. Tamén abordan desafíos clave do medio rural, como a despoboación, o envellecemento da poboación e as desigualdades entre áreas rurais e urbanas.
RuralYouthFuture, un proxecto de Interreg Europe, busca mellorar a eficacia das políticas de emprego xuvenil para o desenvolvemento rural sustentable. Esta ambiciosa iniciativa reúne entidades municipais, rexionais e nacionais de sete países europeos co obxectivo común de atender as necesidades específicas da mocidade nas zonas rurais.
En resposta á evolución do mercado laboral, a través das boas prácticas implementadas en RYF púxose especial énfase na dixitalización como motor clave para crear novas oportunidades de emprego para a mocidade no rural.
A selección tamén reflicte a contribución destas prácticas á hora de afrontar desafíos e xerar novas oportunidades para a mocidade. Prestouse especial atención aos enfoques e ferramentas empregadas. Ademais, tívose en conta a súa contribución aos Obxectivos de Desenvolvemento Sustentable das Nacións Unidas.
A través do intercambio de boas prácticas, os socios garantiron a calidade e o impacto do proxecto. Este proceso permitiu promover a transferencia de coñecemento, a aprendizaxe mutua e a mellora continua entre as entidades participantes, favorecendo solucións innovadoras contrastadas en distintos contextos.
Así mesmo, fortalécese a capacidade dos equipos que traballan no deseño de políticas de emprego xuvenil, permitíndolles apoiar mellor á mocidade das zonas rurais para que permaneza nas súas comunidades, reducir as desigualdades e a fuga de talento, e acceder a máis e mellores oportunidades laborais.
RuralYouthFuture
O proxecto RuralYouthFuture ten como obxectivo impulsar o emprego xuvenil e garantir postos de traballo accesibles e de calidade para os mozos das zonas rurais. Para iso, centrarase en seis instrumentos políticos a nivel municipal, rexional e nacional, co propósito de afrontar o reto común de responder ás necesidades da xuventude en territorios rurais afectados polo descenso poboacional. O proxecto conta coa participación de socios de oito países europeos: España, Bulgaria, Eslovenia, Lituania, Portugal, Estonia, Bélxica e Serbia.
Cun financiamento de 1,9 millóns de euros, o proxecto desenvólvese no marco do programa Interreg Europe, cofinanciado con fondos FEDER.
Máis información
