San Xoán de Río, premiado nos Premios Capitais Europeas da Inclusión e a Diversidade 2026
21/04/2026 | Comisión Europea
— O municipio ourensán recibe o bronce na categoría de vilas de menos de 50.000 habitantes polo seu compromiso coa inclusión e o apoio ás persoas maiores no rural
Bruxelas, 21 de abril de 2026. Ás portas do inicio do Mes Europeo da Diversidade, a Comisión Europea anunciou onte os gañadores da quinta edición dos Premios Capitais Europeas da Inclusión e a Diversidade. Como actuación clave da Unión da Igualdade, este galardón recoñece a vilas, cidades e rexións de toda a UE que destacan pola súa aposta por políticas inclusivas e pola promoción da diversidade.
Entre os premiados deste ano figuran cidades e municipios de Bélxica, España, Hungría, Italia e os Países Baixos. Foron recoñecidos pola súa contribución á creación de sociedades máis xustas mediante a promoción da diversidade e da inclusión en ámbitos como o xénero, a orixe racial e étnica, a relixión e crenzas, a discapacidade, a idade e as identidades LGBTIQ+.
San Xoán de Río foi galardoado coa medalla de bronce pola súa aposta pola accesibilidade, o apoio ás persoas maiores e a abordaxe dos desafíos da vida no rural.
Consultas a lista completa de premios 2026
Entidades locais con máis de 50.000 habitantes
- Ouro para Józsefváros, 8º distrito de Budapest (Hungría), polo seu compromiso coa inclusión a través de políticas de emprego municipal, igualdade LGBTIQ+, integración das comunidades xitanas e loita contra a violencia de xénero.
- Prata para a cidade de Leuven (Bélxica), pola súa loita contra a exclusión mediante proxectos como “Leuven sen racismo” e un plan integral contra a discriminación.
- Bronce para Leiden (Países Baixos), polas súas políticas no marco da estratexia “Leiden inclusiva”.
Entidades locais con menos de 50.000 habitantes
- Ouro para Errenteria (España), polo seu compromiso coa diversidade cultural e co apoio a colectivos vulnerables.
- Prata para Orio (España), pola súa estratexia inclusiva centrada en mulleres, migrantes e persoas vulnerables.
- Bronce para San Xoán de Río (España), polas súas iniciativas para combater a discriminación contra persoas maiores, mulleres e membros da comunidade LGBTIQ+.
Premio a mercados laborais inclusivos
- Ouro para Errenteria, polo seu compromiso cun acceso ao emprego como base da inclusión social.
- Prata para Orio, polas súas políticas de inclusión laboral, especialmente para mulleres migrantes.
- Bronce para a cidade metropolitana de Milán (Italia), polo impulso dun mercado laboral máis xusto e inclusivo.
O premio do público foi para Marsicovetere (Italia).
Contexto
Creado no marco do Plan de Acción Antirracismo da UE 2020-2025 e da Estratexia para a Igualdade das Persoas LGBTIQ+, este premio recoñece cada ano o labor das administracións locais na promoción da inclusión e na loita contra a discriminación.
A Comisión Europea reforzou o seu compromiso coa diversidade nas novas estratexias para o período 2026-2030, nas que seguirá apoiando e dando visibilidade ás autoridades locais que promoven sociedades máis xustas.
A entrega dos premios marcou tamén o inicio do Mes Europeo da Diversidade 2026, centrado nesta edición na promoción de mercados laborais inclusivos e na igualdade de trato para toda a cidadanía.
Fonte: Comisión Europea
