Hiru egunez jarraian, topaketak estatuko eta nazioarteko 140 hizlari baino gehiago eta 100 enpresa erakusketari baino gehiago bilduko ditu. Horrez gain, 190 B2B bilera egingo dira, eta programak erakusketak, kongresu-izaera eta harreman profesionalak egiteko guneak uztartuko ditu.
Testuinguru horretan, Petronorrek nabarmendu nahi izan du bere industria-jarduera egokitzeko burutzen ari den eraldaketa-prozesua, baita karbono-emisio txikiko energia-soluzio berriak garatzeko egiten ari den aurrerapena ere; izan ere, soluzio horiek mesede egiten diote Euskadi deskarbonizatzeko prozesuari.
Ekitaldiaren inaugurazioan, Aitor Arzuaga Petronorreko transformazio-proiektu berrien zuzendariak honako hau nabarmendu du: «Petronorren, erabateko konpromisoa dugu emisioak murrizteko zailtasun handienak dituzten industria- eta garraio-sektoreak deskarbonizatzen laguntzeko funtsezko zereginak betetzearekin. Erregai berriztagarri eta sintetikoen nahiz ekonomia zirkularraren aldeko apustu estrategikoa egin dugu, eta, hala, ildo horretan gauzatzen ari garen proiektu-zorroak 550 milioi eurotik gorako inbertsioa du gaur egun. Gainera, irmo sinesten dugu Euskadin baditugula balio-kate horretan toki sendoa hartzeko behar diren enpresak, talentua eta bultzada. Izan ere, dagoeneko ari gara horretan enpresa-sareko eragileen arteko lankidetzari esker, lankidetza horrek energia-trantsizioa garapen-aukera bihurtzeko bidea zabaltzen baitigu».
