A Asociación de Familiares de Enfermos de Alzheimer e outras demencias de Galicia (AFAGA) celebrou hoxe ás 12:00 na sede da Deputación Provincial de Vigo o acto de entrega de premios do XI Certame Literario de Relato Curto ‘Nun Recuncho da Memoria’ 2025. Nesta edición, os relatos debían orientar a súa temática en torno ao lema de ‘Novos roles familiares nos coidados’, para poñer o foco nas consecuencias das novas estruturas familiares sobre a abordaxe dos coidados informais das persoas con Alzheimer ou outras demencias neurodegenerativas.
Nesta undécima edición resultaron gañadores, pola linguaxe e estilo utilizados, os relatos ‘Dende o fin do mundo’, de Jacobo Vieites Sánchez, e ‘Sempre serei a túa memoria’, de Mónica Vidal Mislata, nas categorías de galego e castelán, respectivamente.
Ao acto acudiron Luisa Sánchez, vicepresidenta da Deputación Provincial de Pontevedra e deputada de Deportes, Economía e Impulso ao Emprego, Ana Pérez Peleteiro, técnica do Servizo de Cultura da Deputación de Pontevedra, Juan Carlos Rodríguez, presidente de AFAGA, e Olga Milla, vicepresidenta de AFAGA.
Necesidade dun novo modelo de coidados, centrado na persoa
No seu discurso de benvida, tras agradecer a asistencia e o apoio da Deputación e do seu Departamento de Cultura a este certame literario de relatos curtos, Olga Milla destacou a aposta de AFAGA pola corresponsabilidade na distribución dos coidados. A vicepresidenta da asociación fixo ademais un chamamento a todos os axentes implicados, administracións, comunidade e asociacións familiares etc., para unirse na creación dun novo modelo de coidados, centrado na persoa, “que facilite o soño de pacientes e familias de permanecer na súa contorna e atendidos nun recurso de proximidade ata o fin dos seus días”.
Tras unha intervención da vicepresidenta da Deputación, Luisa Sánchez, encargada ademais de facer entrega dos galardóns aos premiados, Olga Milla agradeceu a todos os autores de distintas procedencias (España, Europa e Latinoamérica) a súa participación no certame, encomiando a gran calidade dos textos, e dando paso á lectura dos relatos gañadores.
En primeiro lugar proxectouse un vídeo da catalá Mónica Vidal Mislata, gañadora da categoría de castelán, que non puido asistir ao evento por motivos laborais, lendo o seu relato ‘Sempre serei a túa memoria’. Seguidamente, o autor Jacobo Vieites Sánchez, de Arzúa (A Coruñas), gañador do relato en galego, leu en sala a súa obra ‘Dende o fin do mundo’.
Este acto de entrega de premios de relatos curtos forma parte das actividades previstas por AFAGA durante toda esta semana, con motivo da celebración do Día Mundial do Alzhéimer, o vindeiro domingo 21 de setembro.
