— A UE presenta un plan estratéxico para reforzar a súa preparación en defensa de aquí a 2030
— A folla de ruta propón catro iniciativas emblemáticas europeas e un mercado de defensa máis integrado
Bruxelas, 16 de outubro de 2025. A Comisión e a Alta Representante propuxeron hoxe aos Estados membros da UE a folla de ruta «Preservar a paz – Preparación en materia de defensa 2030», un plan global para reforzar as capacidades de defensa europeas.
A este respecto, a presidenta da Comisión Europea, Ursula von der Leyen, declarou:
“As recentes ameazas puxeron de manifesto que Europa está en perigo. Debemos protexer a todos os cidadáns e cada centímetro cadrado do noso territorio. Europa debe responder con unidade, solidariedade e determinación. A folla de ruta sobre defensa presentada hoxe expón un plan claro con obxectivos compartidos e fitos concretos ata 2030. Porque só o que se mide, se fai. Ao pasar dos plans á acción, a folla de ruta propón catro iniciativas emblemáticas europeas: a Iniciativa Europea de Defensa Antidrones, a Vixilancia do flanco oriental, o Escudo Aéreo Europeo e o Escudo Espacial Europeo. Isto reforzará as nosas industrias de defensa, acelerará a produción e manterá o noso apoio continuo a Ucraína.”
Tal e como solicitou o Consello Europeo en xuño, a folla de ruta sobre defensa establece obxectivos e fitos claros para cubrir as lagoas existentes en capacidades, acelerar os investimentos en defensa en todos os Estados membros e orientar os avances da UE cara á plena preparación en materia de defensa antes de 2030. Reforzar a defensa de Europa tamén significa apoiar firmemente a Ucraína.
Iniciativas emblemáticas europeas de preparación
Para actuar con rapidez cando resulte máis eficaz adoptar un enfoque conxunto, a folla de ruta sobre defensa propón catro iniciativas emblemáticas europeas de preparación:
- a Iniciativa Europea de Defensa Antidrones,
- a Vixilancia do flanco oriental,
- o Escudo Aéreo Europeo, e
- o Escudo Espacial Europeo.
Estas medidas reforzarán a capacidade de Europa para disuadir e defenderse en terra, aire, mar, ciberespazo e espazo exterior, contribuíndo directamente aos obxectivos de capacidades da OTAN.
Preparación a través de coalicións de capacidades
A plena preparación en defensa implica garantir que as forzas armadas dos Estados membros poidan anticiparse, prepararse e responder ante calquera crise relacionada coa defensa, incluíndo un conflito de alta intensidade.
A folla de ruta insta os Estados membros a completar a creación de coalicións de capacidades en nove ámbitos clave para cubrir lagoas críticas mediante desenvolvemento e adquisición conxuntos:
- defensa aérea e antimisís,
- elementos de apoio estratéxico,
- mobilidade militar,
- sistemas de artillaría,
- ciberguerra, guerra con intelixencia artificial e guerra electrónica,
- misís e municións,
- drons e sistemas antidrones,
- combate terrestre,
- e ámbito marítimo.
Unha base industrial de defensa europea sólida, resiliente e innovadora
Para cubrir as lagoas existentes, é esencial que a industria de defensa da UE poida ofrecer as capacidades necesarias á escala e coa rapidez requirida. Cómpre aproveitar todo o potencial de innovación en defensa, incluídas as solucións ucraínas, e garantir a resiliencia das cadeas de subministración, reducindo as dependencias críticas de materias primas e outros insumos esenciais.
Impulso ao investimento en defensa
Un mercado europeo de equipos de defensa simplificado e integrado é clave para aumentar a produción, acadar economías de escala e fomentar a innovación.
De aquí a 2030, o obxectivo é establecer un verdadeiro mercado europeo de defensa, con normas harmonizadas que permitan á industria ofrecer resultados á escala e á velocidade necesarias.
A Comisión fará un seguimento da capacidade industrial —comezando pola defensa aérea e antimisís, os drons e os sistemas espaciais— para garantir que Europa poida satisfacer as súas necesidades máis urxentes.
A folla de ruta dá continuidade ao Plan ReArmar Europa / Preparación 2030, que impulsa o investimento público e privado e ofrece aos Estados membros maior flexibilidade financeira para reforzar a produción e a preparación. A Comisión Europea e a Alta Representante presentarán esta folla de ruta ao Consello Europeo, incluíndo propostas de proxectos emblemáticos paneuropeos que orientarán a Europa cara á plena preparación en defensa antes de 2030.
A folla de ruta tamén prevé a creación dunha zona de mobilidade militar a escala da UE antes de 2027, con normas harmonizadas e unha rede de rutas terrestres, aéreas e marítimas que permitan desprazar rapidamente tropas e equipamento por toda Europa. Estes plans, desenvolvidos en coordinación coa OTAN, reforzarán a capacidade europea de resposta ante crises.
Antecedentes
En marzo de 2025, a Comisión e a Alta Representante presentaron o Libro Branco Conxunto “Preparación en materia de defensa europea 2030”, complementado polo Plan ReArmar Europa / Preparación 2030, un ambicioso paquete de defensa destinado a axudar aos Estados membros da UE a obter financiamento para aumentar de forma significativa o investimento en capacidades de defensa.
A activación da cláusula de salvagarda nacional do Pacto de Estabilidade e Crecemento con fins de defensa, así como o instrumento de préstamo “Acción pola Seguridade de Europa” (SAFE), constitúen o eixo central deste plan, que permite ampliar rápida e substancialmente as inversións en defensa europea.
En xuño de 2025, o Consello Europeo convidou á Comisión e á Alta Representante a presentar unha folla de ruta para avaliar os avances do Libro Branco e debater os próximos pasos cara á plena preparación en materia de defensa.
Máis información:
Comunicación Conxunta «Preservar a paz – Preparación en materia de defensa 2030»
Ficha informativa: Preparación 2030
Ficha informativa: Libro Branco Conxunto «Preparación en materia de defensa europea 2030»
