Arnese à u serviziu di a pulitica linguistica destinata à integrà a dimarchja d'immersione territuriale in a strategia generale di rivitalizazione di u corsu purtata da a Cullettività di Corsica, a stampiglia "Paesi è cità immersivi" hè un dispusitivu di creazione di spazii induve a lingua corsa hè presente, vissuta è praticata in tutte e dimensione di a vita cutidiana: istituziunale, suciale, educativa, ecunomica è culturale.
A stampiglia "Paesi è cità immersivi" hà per scopu di custituisce una dimarchja prugressiva, participativa è esigente, basata nantu à a visibilità, l'usu è a trasmissione di a lingua corsa nu u spaziu publicu.
Una chjama à manifestazione d'interessu hà per scopu d'identificà e cumune pilote (almenu 3 : una grande cità, una cità più chjuca è un paese) chì custituiscenu i primi territorii per pruvà a stampiglia.
Seranu identificate, cù sta chjama à manifestazione d'interessu, l'autorità lucale disposte à impegnà si in una dimarchja esigente per sperimentà l'immersione territuriale. Sta scelta rapresentativa permetterà di capì a diversità di i cuntesti, di e sfide è di e capacità d'azzione.
U rolu di e cumune scelte serà principalmente di furnisce à a Cullettività di Corsica, per via di a Direzzione Lingua Corsa, un inseme di dati analitichi è d'osservazione essenziale per u sviluppu d’una cartula di a spampiglia "PAESI È CITÀ IMMERSIVI".
In stu sensu, e cumune pilote seranu invitate à participà à un studiu, un diagnosticu è una valutazione di e pratiche esistente.
Aiuteranu, in particulare, à :
- Ducumentà a situazione attuale ;
- Identificà i duminii di megliurazione ;
- Fà ricullà i prublemi incontrati ;
- Cumunicà cù i servizii di a Cullettività di Corsica durante e visite sopr’à piazza è l'interviste per acquistà una cunniscenza precisa di e realità territuriale.
E cumune pilote diventeranu cusì lochi d'osservazione è di cumpetenze, cuntribuendu à a definizione di un quadru di certificazione realistu, operaziunale è adattabile.
Site una cumuna (chjuca o grande) è vulete prupone a vostra candidatura ?
