— A UE reforza a súa axenda social cun plan para erradicar a pobreza e garantir unha maior inclusión e accesibilidade para as persoas con discapacidade.
Bruxelas, 8 de maio de 2026. A Comisión Europea presentou un amplo paquete de medidas sociais co obxectivo de reducir a pobreza, mellorar o acceso á vivenda e reforzar os dereitos das persoas con discapacidade en toda a Unión Europea. O plan inclúe a primeira estratexia europea contra a pobreza, coa meta de erradicala antes de 2050, ademais de novas iniciativas para combater a exclusión residencial e fortalecer a Garantía Infantil Europea.
Segundo a Comisión, o aumento do custo da vida e a dificultade para acceder a unha vivenda accesible son algunhas das principais preocupacións da cidadanía europea. Actualmente, 1 de cada 5 persoas na UE está en risco de pobreza ou exclusión social, unha situación que afecta especialmente á infancia e ás persoas con discapacidade.
Máis apoio social e acceso á vivenda
As novas medidas céntranse en promover empregos de calidade, garantir un mellor acceso aos servizos básicos e reforzar as axudas sociais. Tamén se propoñen accións para previr o senfogarismo, ampliar a vivenda social e ofrecer máis apoio ás familias vulnerables.
Melloras na inclusión das persoas con discapacidade
No ámbito da discapacidade, a Comisión busca impulsar unha maior inclusión social e laboral mediante melloras en accesibilidade, transporte e tecnoloxías asistenciais, ademais de ampliar a Tarxeta Europea de Discapacidade en toda a UE.
A presidenta da Comisión Europea, Ursula von der Leyen, afirmou que a pobreza e a exclusión son desafíos que Europa “pode e debe superar”, apostando por unha sociedade baseada na igualdade de oportunidades e na dignidade para todas as persoas.
Fonte: Comisión Europea
Máis información:
Preguntas e respostas sobre o paquete da loita contra a pobreza
