— O informe subliña que arredor de 51 millóns de persoas, está actualmente fóra do mercado laboral da UE
— As mulleres, as persoas maiores, as persoas migrantes e con discapacidade son fundamentais para facer fronte á escaseza de capacidades e man de obra na UE
Bruxelas, 16 de setembro de 2025. O informe da Comisión sobre a evolución social e do emprego en Europa en 2025 (ESDE) subliña que unha quinta parte da poboación en idade laboral, arredor de 51 millóns de persoas, está actualmente fóra do mercado laboral da UE, e que as mulleres, as persoas de entre 55 e 64 anos, as persoas migrantes e con discapacidade constitúen a gran maioría. Facilitar o acceso ao mercado laboral tamén contribuiría a alcanzar o obxectivo da taxa de emprego do 78 % da UE para 2030. Ao mesmo tempo, melloraría a cohesión social e apoiaría o obxectivo de redución da pobreza da UE para 2030.
Unha mellor integración destes grupos infrarrepresentados no mercado laboral pode axudar a mitigar a escaseza de capacidades e man de obra e compensar os cambios demográficos que ameazan con reducir a poboación activa da UE en ata 18 millóns de persoas de aquí a 2050.
Principais conclusións do informe ESDE 2025
En 2024, a UE creou 1,8 millóns de postos de traballo máis en comparación co ano anterior, elevando a taxa de emprego ata o 75,8 %, mentres que a taxa de desemprego caeu a un novo mínimo histórico do 5,9 %.
Mulleres: romper barreiras para impulsar a igualdade e o crecemento
- A participación laboral das mulleres na UE segue sendo 10 puntos porcentuais inferior á dos homes, con 32 millóns de mulleres fóra do mercado laboral, principalmente debido ás responsabilidades de coidado non remuneradas, á limitada dispoñibilidade de servizos de gardaría e aos desincentivos nos sistemas fiscais e de prestacións.
- Arredor do 75 % das nais con nenos pequenos fóra do mercado laboral sinalan os deberes de coidado como a razón principal, fronte só ao 13 % dos pais.
- O informe mostra que a ampliación da atención á infancia podería aumentar a taxa de emprego das mulleres nalgúns Estados membros ata nun 30 % e impulsar o PIB da UE ata nun 1,7 %.
Persoas de 55 anos ou máis: permitir unha vida laboral máis longa e saudable
- A pesar dos avances, case 20 millóns de persoas de entre 55 e 64 anos non forman parte do mercado laboral da UE, a miúdo debido ás normas de xubilación, problemas de saúde ou falta de flexibilidade laboral.
- O informe sinala que as reformas das pensións, a xubilación gradual, a ampliación dos coidados de longa duración, a formación e a orientación profesional poden axudar a manter activos a máis traballadores de maior idade.
Migrantes: recoñecemento das capacidades para impulsar a integración
- Máis de sete millóns de persoas migrantes na UE están actualmente fóra do mercado laboral por múltiples razóns, incluídas as dificultades lingüísticas, o non recoñecemento das cualificacións, a discriminación e os obstáculos administrativos.
- As persoas migrantes enfróntanse ao maior risco de pobreza de calquera grupo demográfico da poboación activa (38 %). Porén, achegan habilidades esenciais que poden axudar a abordar a escaseza de man de obra en sectores con necesidades agudas.
- O informe mostra que os incentivos fiscais ben deseñados, xunto co apoio á procura de emprego, a formación lingüística e permisos de traballo máis simples, especialmente cando se combinan, poden aumentar a participación das persoas migrantes no mercado laboral.
Persoas con discapacidade: superación de estereotipos e retos en materia de accesibilidade
- Das 44 millóns de persoas con discapacidade en idade laboral, o 56,4 % traballaba en 2024, fronte ao 55,6 % en 2022, mentres que a taxa para as persoas sen discapacidade era do 84 %.
- O informe conclúe que os réximes de cotas, as medidas contra a discriminación e a colocación laboral específica son ferramentas eficaces para a súa integración. A Estratexia da UE sobre os Dereitos das Persoas con Discapacidade 2021-2030 promove contornos de traballo inclusivos, mentres que a Unión de Capacidades pode apoiar itinerarios de formación inclusivos para aproveitar o potencial das persoas con discapacidade.
Antecedentes
A Evolución social e do emprego en Europa é o informe anual emblemático da Comisión sobre emprego e asuntos sociais. Para facer que o mercado laboral sexa máis inclusivo e abordar a escaseza de man de obra, a Comisión está a desenvolver unha ampla gama de iniciativas. Estas inclúen a Recomendación do Consello de 2023 sobre unha renda mínima adecuada, o Plan de Acción da UE para 2024 sobre a escaseza de man de obra e de capacidades, a Comunicación de 2023 sobre o aproveitamento do talento nas rexións de Europa e a próxima iniciativa para garantir unha mobilidade laboral xusta, transparente e eficaz. O próximo Plan de Acción para o Pilar Europeo de Dereitos Sociais e a folla de ruta para o emprego de calidade reforzarán estes esforzos e contribuirán á competitividade da UE.
Máis información: Comisión Europea
Informe sobre a evolución social e do emprego en Europa en 2025
