A Comisión Europea abre por primeira vez as prácticas do Libro Azul ao alumnado de Formación Profesional
16/07/2026 | Comisión Europea
— O programa emblemático de prácticas da Comisión Europea actualiza as súas normas para incluír ás persoas tituladas en Formación Profesional, reforzar a inclusión e mellorar as condicións económicas das bolsas
— As normas actualizadas aplicaranse á convocatoria de prácticas para marzo de 2027 que se abre o 22 de xullo
Bruxelas, 16 de xullo de 2026. A Comisión Europea actualizou hoxe as normas do seu programa de prácticas, establecendo un marco único modernizado que fai que o sistema sexa máis inclusivo e estea mellor aliñado cos obxectivos europeos en materia de competencias e emprego. Por primeira vez, as persoas tituladas en Educación e Formación Profesional (EFP) poderán optar ao programa de prácticas da Comisión —o coñecido como Libro Azul—, ampliando así o acceso a prácticas de alta calidade e recoñecendo o valor das distintas vías formativas existentes en Europa.
A Comisión dá así un paso importante para garantir que as súas oportunidades de prácticas reflictan mellor a diversidade do talento presente na Unión Europea. Esta medida apoia os obxectivos da Unión das Competencias, axudando ás persoas tituladas en EFP a adquirir unha experiencia profesional relevante nun contorno de administración pública europea de alta calidade. Ademais, recoñece a importante contribución da Formación Profesional ao mercado laboral.
O marco actualizado tamén reforza as condicións económicas das persoas bolseiras mediante a mellora da estrutura das bolsas e das axudas, contribuíndo a reducir as barreiras prácticas e financeiras para acceder ao programa. Estes cambios están deseñados para facer as prácticas máis inclusivas para persoas procedentes de diferentes itinerarios formativos en toda a Unión.
Ao mesmo tempo, as novas normas reforzan o compromiso da Comisión coa inclusión, a igualdade e un contorno de traballo seguro. Promoven a igualdade de trato e buscan garantir que as persoas en prácticas poidan aprender e contribuír nun ambiente baseado no respecto, a dignidade e a igualdade de oportunidades. O novo marco inclúe tamén disposicións claras para combater o acoso e a discriminación e concede unha maior importancia ao equilibrio xeográfico, co obxectivo de asegurar unha ampla representación dos Estados membros.
Ao substituír decisións anteriores dispersas por un marco modernizado e simplificado, a Comisión facilita a comprensión das normas tanto para as persoas solicitantes como para as bolseiras e os distintos servizos implicados. Isto mellorará a coherencia do programa e contribuirá a unha administración máis eficiente.
O novo marco rexerá a organización do programa de prácticas da Comisión conforme a un conxunto de normas máis claras e actualizadas, garantindo que continúe atraendo talento novo de toda a Unión Europea e dos países candidatos que participan na estratexia de preadhesión, ao tempo que ofrece unha experiencia xusta, inclusiva e de alta calidade.
Próximos pasos
As normas actualizadas aplicaranse á convocatoria de prácticas que comezará en marzo de 2027.
O prazo de presentación de solicitudes para esa convocatoria estará aberto entre o 22 de xullo e o 4 de setembro de 2026.
Contexto
O Programa de Prácticas do Libro Azul é o programa emblemático de prácticas da Comisión Europea e atrae principalmente a persoas tituladas universitarias recentes de toda Europa e doutros países. Ofrece ás persoas participantes unha oportunidade única para coñecer de primeira man o funcionamento da Comisión Europea e das institucións da UE en xeral. Ademais, permite comprender mellor os obxectivos da integración europea e as políticas comunitarias mentres adquiren experiencia nun contorno de traballo multicultural.
Co paso dos anos, as prácticas do Libro Azul convertéronse nun dos programas máis prestixiosos e competitivos da Unión Europea. Cada ano reciben arredor de 36.000 solicitudes e ofrecen preto de 2.000 prazas repartidas entre a Comisión Europea, catorce axencias e organismos da UE e o Servizo Europeo de Acción Exterior (SEAE).
Máis información: Comisión Europea
