— O director xeral de Relacións Exteriores e coa UE, Jesús Gamallo, formou parte dunha delegación de 20 dirixentes rexionais en representación da iniciativa #EURegions4Cohesion
— Defenderon unha política de cohesión posterior a 2027 que conte cun orzamento sólido e sitúe ás rexións no centro
Bruxelas, 28 de xaneiro de 2025. O director xeral de Relacións Exteriores e coa UE, Jesús Gamallo, participou hoxe en tres reunións mantidas entre unha delegación de 20 representantes rexionais e membros da nova Comisión Europea encabezada por Ursula Von der Leyen: a vicepresidenta executiva de Persoas, Capacidades e Preparación, Roxana Mînzatu, o vicepresidente executivo de Cohesión e Reformas, Rafaelle Fitto, e o comisario de Orzamento, Loita contra a Fraude e Administración Pública, Piotr Serafin. As tres reunións celebráronse no edificio Berlaymont, sede do executivo comunitario.
A delegación rexional, liderada polo presidente da rexión francesa de Nova Aquitania, Alain Rousset, representou ás 144 rexións europeas que conforman a alianza #EURegions4Cohesion, da que forman parte as 17 comunidades autónomas coordinadas por Galicia. No actual debate sobre o orzamento comunitario posterior a 2027, esta alianza defende unha política de cohesión que conte cun orzamento forte e sitúe ás rexións no centro do seu deseño e aplicación. As 144 rexións recoñecen a necesidade de reformar a política de cohesión e están dispostas a colaborar coas institucións comunitarias para iso, pero se opoñen ás tendencias centralizadoras que socavarían o papel central que deben ter as rexións na xestión dos fondos.
Gamallo advertiu que estratexias autonómicas como a de especialización intelixente en I+D+i ou o Plan Estratéxico 2030 deixarían de ter sentido se o deseño dos fondos se centraliza
Na súa intervención, Jesús Gamallo, puxo en valor a experiencia da administración autonómica na planificación e xestión de fondos, aludindo a estratexias como a de especializacion intelixente en I+D+i ou o Plan Estratéxico 2030. “Todas estas estratexias deixarían de ter sentido se o deseño da execución dos fondos vén determinado polo Estado, como é o caso agora cos fondos Next Generation”.
Estes encontros con tres dos máximos responsables comunitarios supoñen un importante paso na defensa dos intereses rexionais no marco da iniciativa #EURegions4Cohesion, tralo debate organizado no Parlamento Europeo o pasado mes de outubro antes de que a Eurocámara aprobase aos novos comisarios.
Nesta ocasión, os representantes españois na delegación, ademais de Jesús Gamallo, foron o presidente do Goberno Vasco, o Lehendakari Imanol Pradales, xunto co secretario xeral de Acción Exterior e Euskadi Global, Ander Caballero; o secretario xeral de Financiamento Europeo da Junta de Andalucía, Gerardo Fernández-Gavilanes Díez; a secretaria xeral de Unión Europea e Acción Exterior da Generalitat de Cataluña, Lorena Elvira Ayuso; e a directora xeral de Financiamento Autonómico e Fondos Europeos da Junta de Extremadura, Rosa María Ramos Cortina.
Contexto
EURegions4cohesion é unha iniciativa posta en marcha en marzo de 2024 pola rexión francesa de Nova Aquitania e a italiana de Emilia-Romaña. Actualmente está composta por 144 rexións de Alemaña, Austria, Bélxica, España, Finlandia, Francia, Grecia, Irlanda, Italia, Países Baixos, Polonia, Portugal, República Checa, Romanía, Eslovaquia, Eslovenia e Suecia. As 17 comunidades autónomas forman parte dela baixo a coordinación de Galicia. A alianza conta co apoio da Conferencia de Rexións Periféricas e Marítimas (CRPM) e a Rede de Investigación e Innovación das Rexións Europeas (ERRIN).
Máis información: Galicia defende a xestión rexional dos fondos europeos ante os comisarios europeos de Orzamento, Cohesión e Emprego (Xunta)
