— As delegacións autonómicas en Bruxelas puideron abordar con Alejandro Blanco o seu informe sobre a proposta de revisión intermedia da política de cohesión 2021-2027
Bruxelas, 16 de maio de 2025. A Fundación Galicia Europa organizou hoxe un encontro do membro español do Tribunal de Contas, Alejandro Blanco, con representantes do resto de oficinas das comunidades autónomas en Bruxelas. Na xuntanza, abordaron o seu informe sobre a proposta de revisión intermedia da política de cohesión 2021-2027.
No documento, o Tribunal de Contas explica que as modificacións propostas pola Comisión Europea buscan redistribuír os recursos da política de cohesión cara novas prioridades da UE, como a defensa, a vivenda, a enerxía ou a resiliencia hídrica. Os auditores recoñecen a urxente necesidade de responder á situación neses ámbitos, pero advirten de certos riscos e aspectos pouco claros da proposta que afectarán á súa aplicación, como aumentar a presión sobre a capacidade administrativa ou diluír o enfoque da política de cohesión cara a redución das disparidades rexionais.
Mecanismo de Recuperación e Resiliencia
Recentemente, o Tribunal de Contas publicou outra análise na que defende que o fondo da UE para a recuperación trala covid –o chamado Mecanismo de Recuperación e Resiliencia (MRR)– adoece de varias insuficiencias en canto ao rendemento, a rendición de contas e a transparencia. Segundo os auditores, aínda que os 650 000 millóns de euros deste mecanismo desempeñaron un papel crucial na recuperación da UE trala pandemia, a información sobre os resultados é escasa e non hai datos sobre os custos reais. Os auditores piden que se teña isto en conta á hora de deseñar futuros orzamentos baseados no rendemento e non nos custos.
Fonte e máis información: Regulación da política de cohesión: os auditores da UE avalían a proposta de revisión (Tribunal de Contas) / O Tribunal de Contas expón as leccións extraídas das insuficiencias do fondo de recuperación da UE de 650 000 millóns de euros (Tribunal de Contas)
