— O director xeral de Relacións Exteriores e coa UE, Jesús Gamallo, inaugurou a sesión número 50 dos ‘Encontros virtuais Xunta-UE’, moderada pola directora da oficina de Bruxelas da Fundación Galicia Europa, Ana Ramos.
— Francisco Casalduero, en representación da Comisión Europea, e Farrah Lisa Meghazi, subdirectora xeral da Xunta, achegaron as perspectivas europea e galega.
— O encontro contou tamén coa participación do tecido empresarial galego especializado, clave na posta en marcha da Estratexia galega de Seguridade, Defensa e Espazo.
Bruxelas, 24 de setembro de 2025 – O director xeral de Relacións Exteriores e coa UE, Jesús Gamallo, inaugurou esta mañá unha nova edición dos ‘Encontros virtuais Xunta-UE’, que acadaron xa a 50ª sesión dende a súa posta en marcha no ano 2020 pola Fundación Galicia Europa (FGE). A directora da oficina de Bruxelas da FGE, Ana Ramos, foi a encargada de moderar o encontro, que nesta ocasión estivo dedicado á política europea de defensa, un ámbito que gañou protagonismo na axenda comunitaria tras a invasión rusa de Ucraína.
Na súa intervención, o director xeral lembrou as futuras medidas de gran alcance anunciadas pola presidenta da Comisión Europea, Ursula von der Leyen: dende a posta en marcha do instrumento SAFE con 150 000 millóns de euros dispoñibles para compras conxuntas ata o lanzamento dun plan de preparación en materia de defensa con horizonte 2030. Jesús Gamallo explicou tamén que a proposta de novo Marco Financeiro Plurianual prevé destinar 131 000 millóns de euros a defensa, seguridade e espazo, multiplicando por cinco a dotación do período anterior. “Un esforzo sen precedentes”, asegurou, “que abre oportunidades tanto para os Estados membros como para as rexións”. Neste contexto, destacou o papel de Galicia, que leva anos desenvolvendo un ecosistema aeroespacial con aplicacións duais civís e militare.
Tras 50 sesións, os encontros virtuais achegaron as prioridades da axenda europea a máis de 700 representantes do Goberno galego.
Esta 50ª edición tivo tamén un carácter especial, ó contar coa participación de representantes do tecido empresarial galego ligado á Iniciativa Estratéxica en Seguridade, Defensa e Aerospazo. A súa presenza permitiu abrir un diálogo directo entre a Comisión Europea, o Goberno galego e as empresas, un paso esencial para reforzar a posición de Galicia nun sector chamado a medrar con forza na UE.
Pola súa banda, Francisco Casalduero, asesor na Dirección Xeral de Defensa da Comisión Europea, presentou a visión do executivo comunitario sobre as prioridades da política de defensa, os instrumentos dispoñibles e as oportunidades de cooperación para os distintos territorios. En clave galega, Farrah Lisa Meghazi, subdirectora xeral de Promoción Industrial e Solo Empresarial, deu a coñecer a Estratexia Galega de Seguridade, Defensa e Espazo, que prevé un investimento público directo de 183 millóns de euros e a mobilización de ata 900 millóns adicionais. O seu obxectivo é reforzar o ecosistema empresarial, apoiar a innovación e consolidar a Galicia como referente nacional nestes sectores estratéxicos.
Encontros virtuais Xunta-UE
Máis de 700 representantes da Xunta participaron nas 50 sesións dos ‘Encontros virtuais Xunta-UE’, celebrados dende 2020. A Fundación Galicia Europa impulsou esta iniciativa durante a pandemia, para informar da resposta da UE e o deseño do período de programación 21-27, que evolucionou ata converterse nun foro mensual no que debater sobre os temas da axenda comunitaria máis relevantes para Galicia.
Máis información
— Análise FGE– Acción pola Seguridade de Europa (SAFE)
— Análise FGE– O Compás para a Competitividade da UE
